Baliwag News Service – Baliwag News Online

YES TO BALIWAG CITY! Tuloy na Tuloy na!

Advertisements

Sigurado nang aarangkada ang cityhood ng Baliwag matapos magpahayag ng suporta si Bulacan 2nd District Gavini “Apol” Pancho sa pagpupulong na dinaluhan din ni Mayor Ferdie Estrella, at ilang opisyal sa House of Representatives kamakailan.

Dahil sa pagsang-ayon ng partido nina Estrella at Pancho, natuldukan na rin ang ispekulasyon patungkol sa posibleng paglalaban ng dalawa sa susunod na halalan.

Ayon kay Cong. Noel Villanueva ng Ikatlong Distrito ng Tarlac at Chairman ng House Committee on Local Government, ang komite na didinig sa kalunsuran, nakatakda ang makasaysayang pagdinig para sa kalunsuran ng Baliwag sa Agosto 25, 2021.

Ang pagkakasundo ng dalawang panig ay nagbibigay puwang upang amyendahan ang House Bill 7362 na may pamagat na “An act converting the Municipality of Baliwag into a component city of the Province of Bulacan to be known as Baliwag City, na naunang inihain nina Cong. Paolo Duterte at Cong. Eric Go Yap ng ACT CIS Partylist noong Agosto ng nakaraang taon.

Samantala, malaki ang naging partisipasyon ng negosyanteng si G. Bong Pineda ng Pampanga, Bulacan 3rd District Congresswoman Lorna Silverio at Cong. Noel Villanueva para pagkaisahin ang damdamin ng dalawang opisyal na taga Baliwag, upang umusad na ang pagdinig at maipapasa ang batas para sa kalunsuran ng Baliwag.

Matatandaan na ang kalunsuran ng Baliwag ay isinulong ni Mayor Ferdie matapos na makamit nito ang dalawa sa tatlong mahahalagang pamantayan – populasyon at kita. Nagtala ang Bayan ng Baliwag ng 168,732 (150,000 law requirement) na indibidwal sa nakaraang 2020 Census of Population and Housing samantalang ang kita ay pumalo sa mahigit sa 220M at 258M o may katumbas na halaga na 103M ar 118M (100M deflated using year 2000 constant prices) noong 2018 at 2019.

Ani Mayor Ferdie, ang pagsuporta ni Cong. Apol ay mahalaga para sa mga Baliwagenyos lalo na ngayon upang higit na mapabilis pa ang ating pagbangon at pagsulong ng progreso ng ating bayan.

Nagpasalamat si Mayor Ferdie Estrella sa mga pribadong tao at mga kongresistang tumulong upang maisulong ang kalunsuran ng Baliwag.

Nagpahayag naman ng pagkakaisa at pagtutulungan ang dalawang kampo para sa kaunlaran ng Baliwag.####

August 6, 2021August 6, 2021 by BaliwageKnow

Suspek sa ilang holdapan sa dalawang bayan ng Bulacan, arestado sa Baliwag!

Advertisements

Iniharap ng PNP-Baliwag kay Mayor Ferdie Estrella ang kanilang nadakip na isang robbery-holdup suspek, na diumano’y nambibiktima ng mga babae sa labas ng mga mall sa dalawang bayan ng Bulacan, isang araw matapos maiulat ang nasabing krimen.

Kinilala ni PLtCol. Jayson San Pedro, hepe ng PNP-Baliwag, ang suspek na si Naldy Adriano Guinto, 52 taong gulang, negosyante at residente ng Pulilan, Bulacan.

Nitong Hunyo 17, nambiktima ang suspek ng isang babae na itinago sa pangalan na “Kat-Kat” sa parking lot ng SM City Baliwag. Ayon sa kwento ng biktima, katatapos lamang niyang mamili at pagkasakay nito sa kaniyang kotse ay sinundan agad siya ng suspek, tinutukan ng baril, at kinuha lahat ng kaniyang gamit pati ang kaniyang pera.

Agad naman na humingi ng tulong ang biktima sa mga awtoridad upang maaksyunan ang nasabing insidente.

Sa pakikipag-ugnayan ng Baliwag PNP sa PNP Plaridel at Pulilan, nadakip si Guinto sa parking lot ng WalterMart Plaridel, dahil nakita ang kaparehas na sasakyan na ginamit sa SM City Baliwag Robbery Incident. Personal naman na kinumpirma ng biktima na ang nahuling driver ng sasakyan ay ang mismong suspek sa nasabing pagnanakaw.

Ayon sa police report, modus operandi ni Guinto ang diumano’y pumupwesto siya sa mga mall gamit ang isang Xpander. Dito ay maghihintay siya ng mga babaeng katatapos lamang mamili o mag-grocery at sasabayan pumasok sa kanilang mga sasakyan, tututukan ng baril at sila ay pag-wiwithdrawhin ng pera.

Dagdag pa nila, nabalitaan din ng kanilang tanggapan na may ganitong klase ng krimen ang naganap sa WalterMart Plaridel noong Hunyo 5.

Binati naman ni Mayor Ferdie ang PNP sa kanilang matagumpay na paghuli sa suspek. Ayon sa punongbayan, nang malaman niya ang nangyaring insidente ay pinamanmanan niyang ito mabuti sa kapulisan dahil hindi niya hahayaan na may mga ganitong klase ng krimen sa Baliwag. Dagdag pa niya, layunin niya bilang alkalde na mapanatili ang katahimikan at kaayusan sa kaniyang bayan.

Hinihikayat din naman ng pulisya ang lahat ng mga nabiktima ni Guinto na magtungo sa kanilang tanggapan upang pormal na magsampa ng kaso habang kasalukuyang iniimbestigahan ng awtoridad ang suspek.

###

June 19, 2021June 19, 2021 by janchinitamay

ECQ Ayuda kada pamilya, inihatid sa lahat ng kabahayan sa Baliwag

Advertisements

BALIWAG, Bulacan- Halos 40,000 pamilya sa bayang ito ang tumanggap ng ayuda mula sa P123 Milyong pondong inilaan ng Pamahalaang Nasyonal, upang makatulong sa mga indibidwal na apektado ng pagdedeklara ng Enhanced Community Quarantine (ECQ) noong Marso 29 hanggang Abril 11, kabilang ang mga naging benepisyaryo ng Social Amelioration Programs 1 and 2.

Ito ay pauna lamang dahil inihayag ni Mayor Ferdie Estrella na lahat ng pamilya sa Baliwag ay mabibigyan ng ayuda, anuman ang estado nila sa buhay. Naniniwala si Estrella na lahat ay naapektuhan ng muling pagsasailalim ng National IATF sa ECQ sa mga lungsod ng NCR at mga karatig lalawigan kabilang ang Bulacan, Cavite, Laguna at Rizal na bahagi na tinaguriang NCR+ Bubble.

Ayon kay Estrella, ang ayuda ay ipinamahagi sa pamamagitan ng house-to-house o pagbabahay-bahay ng binuong pay-out teams ng Munisipyo. Ang aktwal na bilang ng pamilya ay ayon sa naitala sa Baliwag Pagbangon Census 2021 na ginawa noong Pebrero hanggang Marso, taong kasalukuyan.

Ipinagmamalaki ni Estrella, na dahil sa local census na inisyatibo ng Pamahalaang Bayan, nagkaroon ng maayos at tiyak na basehan sa datos ng pamilyang naninirahan sa Baliwag, kaya mabilis na nakapagdesisyon ang pamunuan na bigyan na ang lahat ng pamilya. Gagamitin din ang mga nalikom na datos sa iba pang programang ipapatupad ng Baliwag sa hinaharap.

Sa nasabing census, naitala ang 46,103 bilang ng pamilyang nakatira sa Baliwag nitong Marso 2021. Ang pondong ibinaba ng Pamahalaang Nasyonal ay naipamahagi lamang sa 39,214 pamilya, base sa ulat na na-generate sa Baliwag Household Information Management System. Ito ay isang system na dinisenyo ng Municipal Information Communication and Technology Office para sa tagging ng mga tumanggap ng ayuda base sa census.

Dahil dito, nagkaisa ang mga opisyal na isulong ang paglalaan ng karagdagang pondo mula sa General Fund ng Baliwag na sinang-ayunan ng Sangguniang Bayan sa pamamagitan ng Kapasyahan Bilang 37- “Isang kapasyahang bayan ng paglilipat pondo ng bawat opisina na may kabuuang halagang P13,671,000.00 na gagamitin upang bigyang ayuda ang mga mamamayan na apektado ng Enhanced Community Quarantine sa bayan ng Baliwag.”

Bunsod ng resolusyon para sa karagdagang pondong inilaan ng lokal na Pamahalaang Baliwag, umarangkada na rin ang house-to-house pay-out sa mga natitirang barangay kabilang ang Pagala at Makinabang. Samantala, naliquidate na ang pondo mula sa nasyonal, base sa itinakdang deadline noong Mayo 15.

Ayon pa rin kay Mayor Estrella, ang mga naka-apila o humabol na indibidwal, base sa ulat ng mga Barangay Grievance Desk na binuo para sa ayuda, ay pag-aaralan din, at kung mapapatunayan na eligible sila na makatanggap ng ayuda, ay hindi mag-a-atubili ang Pamahalaang Bayan na isama sila sa mga bibigyan ng ayuda.

Kada pamilyang Baliwagenyo ay tumanggap mula P1,000 ngunit hindi tataas sa P4,000 na itinakdang ceiling, ayon sa guidelines ng national government.

###

May 21, 2021May 21, 2021 by janchinitamay

Dalawang bagong access roads, pinasinayaan sa Baliwag

Advertisements

BALIWAG, Bulacan- Bilang katuparan sa mga gawaing pang-imprastruktura na ipinangako ni Mayor Ferdie Estrella, binuksan na ang dalawang bagong access roads para maging alternatibong daan sa mga motorista sa bayang ito.

Sa pangunguna ni Mayor Ferdie , kasama si DILG Provincial Director Darwin David, mga Konsehal ng bayan- Atty. Buko Dela Cruz, Dingdong Nicolas, Willy Lapira, at Tony Patawaran, pinasinayaan noong ika-19 ng Mayo ang Sto.Cristo-Bagong Nayon-Pagala Access Road na isang parallel road sa tinaguriang EDSA ng Baliwag, ang BS Aquino Avenue.

Ang nasabing proyekto ay pinondohan ng DILG sa pamamagitan ng Local Government Support Fund- Assistance to Disdavantaged Municipalities (LGSF-ADM) 2017- Core Local Access Road sa Barangay Sto. Cristo at Bagong Nayon. Ito ay nagkakahalaga ng P13 Milyon.

Sinundan ito ng Local Bridge Construction sa Barangay Pagala, mula pa rin sa LGSF-ADM 2020, at nagkakahalaga ng P8.9 Milyon.

Bagamat pandemya, masayang inihayag ni Mayor Ferdie na maaari nang daanan ng mga papasok sa bayan ng Baliwag, at palabas sa DRT highway kung manggagaling sa loob ng bayan, ang nasabing access road na may lapad na 12 metro at habang 550 metro. Ito rin ay may apat na lanes.

Aniya, malaking ginhawa ito sa mga motorista para maiwasan ang build-up ng mga sasakyan dahil sa maraming establisyemento at negosyong nag-ooperate sa kahabaan ng BS Aquino.

Noong 2018, sa isinagawang ebalwasyon ng DILG sa mga proyektong pinondohan ng LGSF-ADM, pinuri ang naturang daan sa Baliwag, dahil sa mga economic opportunities na maaari nitong buksan sa lugar na dinaanan ng bagong gawang kalsada. Anila, dahil malapad, at istratehiko ang lokasyon ng access road, magbibigay-daan ito para buhayin ang mga lupang hindi mapakinabangan noong mga nakaraang taon.

Samantala, binuksan na rin ang access road sa Barangay Piel na pangunahing pakikinabangan ng higit 200 pamilyang nakatira sa pabahay na Francoville at Starville, mga proyektong pabahay ng mag-ama, si dating Mayor Romy, at Mayor Ferdie, katuwang ang samahang Gawad Kalinga at ANCOP-Canada.

Sa malapit na hinaharap, makatutulong din ang daang ito sa kabuuang site development sa Barangay Piel, kung saan pinag-aaralan na itayo ang Baliwag Sports Complex.

###

May 20, 2021May 20, 2021 by janchinitamay

Clearing at relief operations sa Baliwag, nagsimula na matapos ang Bagyong Ulysses

Advertisements

Sinimulan na nitong nakaraang linggo ng Lokal na Pamahalaan ng Baliwag ang clearing operations sa mga kalsadang naapektuhan ng Bagyong “Ulysses”, upang matiyak ang kaligtasan ng bawat isa.

Sa pangunguna ni Mayor Ferdie Estrella, katuwang ang Municipal Environment and Natural Resources Office (MENRO), Baliwag Traffic Management Office (BTMO), Municipal Disaster Risk Reduction and Management Office (MDRRMO), Philippine National Police (PNP)-Baliwag, Solid Waste Management Unit, Brgy Poblacion, Meralco, CM Pancho Construction at ELCOR, ay mabilis na nalinis ang mga kalsada at naayos ang mga poste ng kuryente na napinsala ng nasabing typhoon.

Lubos naman ang pasasalamat nj Mayor Ferdie sa lahat ng mga nagpaabot ng kanilang mga dasal, tulong at donasyon para sa mga Baliwagenyos.

Dagdag pa ng punongbayan, patuloy ang pamamahagi ng relief operations ng pamahalaang bayan para sa mga lubhang naapektuhan ng bagyo. Tinitiyak din ng alkalde na ginagawa nila ang lahat upang sila ay matulungan at makabangon muli.

Para naman sa mga nais magbigay ng kanilang donasyon o tulong, maaari kayong makipag-ugnayan sa Baliwag Public Assistance and Complaint Center o tumawag sa numerong 0977-505-7827.

###

November 23, 2020 by janchinitamay

Mural painting alay para sa mga frontliners, tampok sa Baliwag

Advertisements

Bilang pagkilala sa kabayanihan, pinasinayaan ngayong araw ng Miyerkules, Setyembre 30 sa Baliwag, sa pangunguna ni Mayor Ferdie Estrella, kasama sina Konsehal Lowell tagle at ilang miyembro ng Guhit Pinas-Bulacan, ang mural painting na alay para sa lahat ng frontliners, na patuloy na nakikipaglaban sa gitna ng pandemya.

Para kay Mayor Estrella, malaki ang kaniyang paghanga at pag respeto sa lahat ng mga frontliners, dahil hindi biro ang kanilang pagod at sakripisyo, upang mapangalagaan ang kalusugan ng bawat isa.

Lubos din pinasalamatan ng punongbayan ang kaniyang matalik na kaibigan na si Joel Miranda o mas kilala bilang Boss J. Ayon sa kaniya, si Boss J ang nag-alaga sa kaniya noong nagpositibo siya sa COVID-19 at tumulong upang mas mapabilis din ang kaniyang paggaling mula sa nabanggit na sakit.

Dagdag pa ng punongbayan, handog din nya ang proyektong ito sa bayan ng Baliwag ngayong buwan ng kaniyang kaarawan.

Ang obra ay inilikha ng mga Baliwagenyong alagad ng sining na kasapi ng Guhit Pinas-Bulacan na sina Mc Clen Talento, Ralz Jerome Taberao at Lawrence Victorino.

Hango ang nasabing mural sa isa nang naunang likha ni Talento na pinamagatang “Sana Bukas Pagmulat ng ating Mata” na ginamit din bilang poster para sa Araw ng Kalayaan at Linggo ng Wika. Ngunit sa pagkakataon na ito, inilapat nila sa mas malaking pader na may taas na 8 metro at lapad na 14 na metro ang kanyang nasabing obra. Ilang elemento din ang nadagdag dito, kasama na ang mga katagang, “Maraming Salamat” na isinulat sa baybayin.

Kinilala din ng punongbayan ang mga pintor ng nasabing mural, bilang pasasalamat sa kanilang kamangha-manghang obra na matatagpuan sa Baliwag Climate Change Center.

###

September 30, 2020September 30, 2020 by janchinitamay

Contact-tracing sa Baliwag, mas pinabilis gamit ang IAMSAFE App

Advertisements

Nag-develop ang Pamahalaang Bayan ng Baliwag ng isang digital application at IT system para mapabilis ang isinasagawang contact tracing sa bayan na ito.

Sa pamamagitan ng IAMSAFE App na isang web based application at mada-download sa Google Playstore, mas mabilis na ngayon ang pag-gegenerate ng report para sa contact tracing.

Ayon kay Mayor Ferdie Estrella, ang IAMSAFE App na nagbibigay ng unique QR code sa users nito ay ginagamit na ng 265, 235 Baliwag residents at non-residents bilang digital quarantine pass, at may feature na State of Health Declaration.

Dagdag pa ni Mayor, “Dahil sa IAMSAFE QR code, maiiwasan ang manwal na pagsusulat na maaaring magdulot ng hawaan. Higit din itong makatutulong upang mapabilis ang pagsasagawa ng contact tracing sa bawat kaso ng COVID-19 sa ating bayan. Kung mabilis nating maisasagawa ang contact tracing ay mas mabilis nating mapipigilan ang pagkalat ng virus na ito.”

Samantala, ang IAMSAFE Contact Tracing System naman ay isang passive tracker ng lokasyon. Ito ay active lamang na nakakapagtala ng footprint ng may account sa tuwing inaabot ng user ang kanyang IAMSAFE QR code sa isang nag-scan na establisyimento.

Ang mga footprint o scanned QR code ay napupunta sa isang storage server at nabubuksan lamang ng isang awtorisadong document controller sa tuwing nasasama ang isang establisyimento na exposed sa isang COVID-19 positive at ang partikular na araw at oras lamang ang binubuksan.

Ito rin ay may audit log upang malaman ang history ng paggamit ng sistema upang maiwasan ang anumang uri ng pag-aabuso sa paggamit nito. Ang mga datos ay kusang nabubura pagkatapos ng 30 araw.

Ayon kay Estrella, “Sinisiguro namin na ang sistema ay compliant sa aming ISO Procedures sa pagkuha ng mga datos at sa Privacy Law ng ating bansa.”

“Bukod rito, ang aming website ay may kaukulang SSL o Secure Socket Layer upang maiwasan ang anumang banta na i-hack at nakawin ang mga datos,” dagdag pa niya.

Matatandaan na noong nakaraang Hulyo ay inilunsad ng Pamahalaang Bayan ng Baliwag ang paggamit ng IAMSAFE Web Application, kasunod ng patuloy na pagtaas ng mga kumpirmadong kaso ng COVID-19 sa nasabing bayan.

Sa pamamagitan ng IAMSAFE QR Code at System, isang pindot lang ay makikita na agad ang mga tao na nakasabayan ng positive patient sa isang lugar, at dahil sa impormasyon na kanilang inirehistro sa kanilang IAMSAFE account, sila ay madaling maaalerto o matatawagan ng Baliwag Contact Tracing Team para sa angkop na payong medikal.

Ang IAMSAFE ay ginagamit na rin sa mga tanggapan ng pamahalaan sa Baliwag, mga simbahan ng iba’t ibang relihiyon, palengke, supermarkets at iba pang commercial establishments na may walk-in clients.

###

September 23, 2020 by janchinitamay

Higanteng Recycled Christmas Tree sa Baliwag, handog sa mga COVID-19 Frontliners

Advertisements

Bilang simbolo ng pag-asa, inilawan ngayong araw ng Biyernes, Setyembre 18 sa Baliwag ang 35-talampakang at maituturing na pinakamataas na Giant Recycled Christmas Tree sa buong Bulacan. May mga disenyo itong Christmas Balls, tampok ang iba’t ibang mukha ng paglilingkod ng mga magigiting na frontliners sa laban kontra COVID-19.

Ang higanteng recycled Christmas Tree ay gawa mula sa mga recycled at eco-friendly materials na binubuo ng 5,700 ‘used plastic cups’ at 400 kilos na mga pinutol na sanga ng kahoy. Nilagyan din ito ng mga LED lights upang makapagdagdag atraksyon din.

Ayon kay Mayor Ferdie Estrella, ang nasabing Christmas Tree ay magsisimbolo ng pag-asa para sa bawat isa at bilang taos-pusong pasasalamat din sa lahat mga bayaning frontliners, na patuloy na nagbibigay ng kanilang serbisyo at nagsasakriprisyo para sa mga Pilipino na higit na nangangailangan.

Kasabay nito, binuksan na rin ngayong gabi ang Baliwag Bibingkahan Strip sa Heroes Park kung saan mabibili sa take-out, pick-up at delivery services ang mga paboritong pagkain sa Kapaskuhan gaya ng bibingka, puto bungbong at bichu-bichu.

Minabuti rin naman ng lokal na pamahalaan na ipalabas na lang online ang nabanggit na aktibidad, upang maiwasan ang mass gathering at mapanatili ang social distancing sa nasabing pook.

###

September 18, 2020September 18, 2020 by janchinitamay

Learning Modules, iba pang ayuda para sa public students, libreng ipamamahagi sa Baliwag

Advertisements

Magandang balita ang ipinaabot ni Mayor Ferdie Estrella sa mga magulang ng pampublikong mag-aaral mula elementarya hanggang junior high school dito sa Baliwag, dahil sa bagong sistema ng pag-aaral sa panahon ng global pandemic, sasagutin na ng Pamahalaang Pambayan ng Baliwag ang mga gamit na kinakailangan para makapagpatuloy ng pag-aaral ang mga bata na walang access sa makabagong teknolohiya sa kanilang mga bahay.

Ayon kay Mayor Ferdie, sasagutin na ng munisipyo ang printing para sa modules na indibidwal na ipamimigay sa mga mag-aaral.

Nilalaman ng nasabing module ang mga leksyon na pag-aaralan ng mga estudyante para sa kanilang mga asignatura, na may 1:1 ratio ng module sa mag-aaral na nakapaloob sa isang customized module bags na libre ring ipapamahagi sa mga mag-aaral.

Bukod dito, palalakasin din ang libreng wifi connection sa 27 barangays at sa mga school zone para sa mga mag-aaral na gagamit ng synchronous learning sa pamamagitan ng online classes.

Dagdag pa ng punongbayan, magbibigay din ang lokal na pamahalaan ng mga internet vouchers na magagamit ng mga mag-aaral sa mga matutukoy na partner internet shops, para sa online learning at pagreresearch ng mga bata, habang mahigpit na ipinatutupad ang minimum health standards.

Nasa P3.7 Milyon ang kabuuang halaga ng printed modules na ipagkakaloob sa mga pampublikong mag-aaral sa Baliwag.

Dahil sa COVID-19, nagkaroon ng malaking pagbabago ang tradisyunal na face-to-face na pag-aaral sa Pilipinas. Sa ilalim ng Learning Continuity Plan ng Department of Education, nakapaloob ang mga Learning Delivery Modes na gagamitin sa panahon ngayon gaya ng online learning, self-learning modules, TV at radio sa pag-aaral ng mga estudyante. Ito ay upang maiwasan ang pagkalat ng na nabanggit na sakit habang wala pang bakuna at gamot na naiimbento para rito.

Magiging available ang mga printed materials na maaaring gamitin ng mga mag-aaral bago ang pagsisimula ng klase sa bagong iskedyul nito sa Oktubre 5. Ito ay ipapamahagi sa bawat barangay base sa iskedyul na itatakda ng DepEd Baliwag.

###

September 17, 2020September 17, 2020 by janchinitamay

Ilang Residente ng Baliwag, umalma sa modus ng 5 Pulis Candaba

Advertisements

Humingi ng tulong kamakailan ang anim na residente ng Baliwag sa Tanggapan ng Punongbayan, Mayor Ferdie Estrella kaugnay sa diumano’y reklamong robbery extortion at abduction na kinasasangkutan ng limang Candaba Police.

Sa police blotter na nakuha sa Baliwag PNP station, tinukoy ang mga nirereklamo na sinaPCPT Michael Ray Bernardo, PSSg Cliford Fega, PCpl John Turqueza, PCpl Khris Carlo Celso at Pat Roel Chan.

Ayon sa mga dumulog kay Mayor Ferdie, nangyari ang diumano’y pang-aabuso sa kapangyrihan ng mga nasabing naka-uniporme sa iba’t ibang okasyon at barangay sa Baliwag noong mga buwan ng Marso, Abril at Hulyo, taong kasalukuyan.

Sa parehong ulat ng Baliwag PNP, kinilala ang mga nabiktima na sina Ronald Dan De Guzman, James Polintan, Leopoldo Angeles Sanguyo, Dennis Domingo y Tecson, Jayson Lim Dela Merced at Juan Carlo Pili Martin, mga residente sa bayang ito.

Sa kwento ng mga biktima, lumabas na pare-pareho silang nakaranas ng pagdakip o abduction ng Intel Operatives of Candaba Municipal Police Station sa iba’t ibang lugar sa Baliwag. Bukod dito, hiningan diumano sila ng malaking halaga kapalit ng kanilang kalayaan.

Bagamat takot ang mga biktima sa kanilang dinanas, hindi umano sila nagpasindak sa tangkang pangingikil o extortion, subalit sila ay kinasuhan ng paglabag sa RA 9165 Comprehensive Dangerous Drug Act of 2002, RA 11332 Non Cooperation of Notifiable Diseases at RA 10591 Illegal Possession of Firearms and ammunition.

Agad namang ipinag-utos ni Mayor Ferdie sa Baliwag PNP na isecure ang mga kuha ng CCTV sa mga lugar na tinukoy ng mga biktima upang magamit na ebidenysa laban sa mga inirereklamong pulis Candaba.

Ayon kay Estrella, hindi kailanman dapat naabuso ng mga nasa kapangyarihan ang mga sibilyan dahil taliwas ito sa sinumpaan nilang tungkulin na protektahan ang mga mamamayan, at magpatupad ng katahimikan at kaayusan.

Nangyari ang mga insidente sa panahon na ipinatutupad ang community quarantine bunsod ng kinakaharap na global pandemic na COVID-19.

Sa patuloy na pakikipag-ugnayan sa Baliwag PNP, napag-alaman na ang mga inirereklamong pulis ay may mga nakabinbing reklamo sa Napolcom at PNP Iternal Affairs Service.

Ni-relieve na rin sila sa kanilang police assignment sa bayan ng Candaba.

###

August 14, 2020 by Baliwag News Online

Baliwag, nagpatupad ng Digital Quarantine Pass

Advertisements

Imbis na mag-imprenta ng panibagong quarantine pass, ipinatutupad sa Baliwag ngayong panahon ng Modified Enhanced Community Quarantine (MECQ) ang Digital Quarantine Pass na naka-kabit sa hi-tech na IAMSAFE Web App na dinevelop ng Pamahalaang Bayan ng Baliwag noong unang ipinatupad ang lockdown.

Sa pamamagitan ng unique QR Code na ibinibigay sa lahat ng nagrehistro sa nasabing application, mabilis na nai-tag ng Baliwag Municipal Information Communication and Technology Office (MICTO) ang mga awtorisadong lumabas kada tahanan, kung kaya pag punta nila sa establisyemento gaya ng palengke at grocery stores na gumagamit na rin ng IamSafe QR scanner, madaling natutukoy kung sila ay pinapayagang lumabas o hindi ayon sa ipinatutupad na alituntunin ng Baliwag IATF.

Sa Utos Tagapagpaganap Blg. 29 na inilabas ni Mayor Ferdie Estrella noong ika-3 ng Agosto, isinasaad sa Seksyon 3. Clustering at Quarantine Pass, “ang bawat tahanan ay magkakaroon ng isang (1) kinatawan na pahihintulutang makabili ng kanilang mga pangangailangan sa mga araw na itinakda para sa kanilang Barangay. Ang listahan ng mga pangalan na may pahintulot na lumabas sa bawat bahay ay isusumite ng bawat barangay sa Baliwag Municipal ICT Office, na siyang magiging basehan ng tagging na isasagawa ng nasabing tanggapan.

Upang maiwasan ang pagbugso at pagkukumpulan ng mga mamamayan sa iba’t-ibang establisyimento, mahigpit na ipapatupad ang clustering sa Pamilihang Bayan, mga talipapa (Concepcion, San Jose, Sagrada Familia, Sta. Barbara, Tiaong, Ron-Ron atbp.) at mga supermarkets.

https://baliwagnewsonline.com/wp-content/uploads/2020/08/rpreplay_final1596777089.mp4?_=1

Ang IAMSAFE web application ay ginawa para sa mabilis na contact tracing sa bayan ng Baliwag.

Ipinatupad sa Baliwag ang paggamit ng makabagong teknolohiya upang maiwasan ang manual registration sa mga pampublikong lugar at commercial establishments, kung kaya isinulong ang mas mabilis at accurate na pagtukoy sa mga indibidwal na maaaring nakasama ng isang nagpositibo sa COVID-19.

Gamit ang IAMSAFE Web App, mabilis na nakapag-gegenerate ng report para sa contact tracing na sinisimulan sa nakalipas na 14 araw bago lumabas ang resulta sa swab test ng isang COVID patient.

Sa nasabing system, isang pindot lang ay makikita na agad ang mga tao na nakasabayan ng positive patient sa isang lugar, at dahil sa impormasyon na kanilang inirehistro sa kanilang IAMSAFE account, sila ay madaling maiaalert o matatawagan ng Contact Tracing Team para sa angkop na payong medikal.

Ayon Kay Mayor Ferdie, umaabot na sa 173,491 ang individual users ng IAMSAFE QR Code.

https://baliwagnewsonline.com/wp-content/uploads/2020/08/img_3950.mp4?_=2

Ang automated registration gamit ang QR scanner ay ginagamit na rin sa mga tanggapan ng pamahalaan sa Baliwag, mga simbahan ng iba’t ibang relihiyon, palengke, supermarkets at iba pang commercial establishments na may walk-in clients.

####

August 7, 2020August 7, 2020 by janchinitamay

#WALANG PASOK! EID AL -ADHA

Advertisements

READ: Palace declares July 31, 2020 as holiday to give way for the celebration of the Eid al-Adha of our fellow Muslim people.

Eid al – Adha or the feast of sacrifice is a momentous day for our fellow Muslim people as they celebrate the end of Ramadan. Amidst the COVID-19 global pandemic, the Inter-Agency Task Force (IATF) have already allowed mass gatherings for churches and worship areas given that proper social distancing was observed to ensure public safety. Wearing of face masks and proper hand washing are still mandatory before entering the worship areas.

July 30, 2020 by eimron02

SMCB partners with Phoenix Aralinks LMS to deliver Q TIME²

Advertisements

Amidst the new normal in education, SMCB, in partnership with Phoenix Aralinks Learning Management System, assures its students continuity of learning.

In spite of the unprecedented challenges schools are facing, SMCB remains unfazed and true to its commitment to deliver the best kind of education you deserve –Quality Transformative Ignacian Marian Education through Quality Technology Infused Modes of Education — .

Q TIME² will provide you with innovative learning experiences the RVM way, powered by Phoenix Aralinks LMS and our own teacher-designed learning modules.

#YouKnowTheDifference
#QTIME²

July 23, 2020July 23, 2020 by cristianpauldeguzman

Bayanihan sa Bakuran Tiktok Edition ng SK Federation!

Advertisements

Bilang pakikiisa sa Bayanihan sa Bakuran na programa ng ating lokal na pamahalaan ay nagbuo ang Baliwag SK Federation ng Tiktok Video Competition upang maipamalas ang talento at pagkamalikhain ng mga kabataang Baliwagenyo habang pinapanatili ang kalinisana t kaayusan ng kanilang bakuran ngayong panahon ng pandemya. Sa kanilang Facebook Ad na matatagpuan sa opisyal na Facebook Page (Baliwag SK Federation) ay nakapaskil ang lahat ng detalyeng kinakailangan upang sumali.

Kabataan naman ang hahataw next week sa Tiktok sa Bakuran.

Basahing mabuti ang mechanics. Hataw na!

1. Para sa Kabataang Baliwagenyo, 13 to 30 years old.
2. I-Like ang Bayanihan sa Bakuran Facebook Page.
3. Gumawa ng Tiktok Video sa inyong bakuran o halamanan gamit
ang isa sa mga sikat na Dance Challenge sa Tiktok.
5. I-send ang video sa pamamagitan ng private message sa Bayanihan sa Bakuran Page,
kasama ng inyong buong pangalan, barangay at contact number.
6. Ang deadline ng pagpapadala ng tiktok video ay sa Martes, July 21, 10:00pm.
7. Ang lahat ng makakasaling video ay aming ipopost sa Bayanihan sa Bakuran Page sa Miyerkules, July 22, 2020, 9am para sa online voting sa pamamagitan ng dami ng reactions.
8. Ang deadline na pag-post ng reaction ay sa Huwebes, July 23, 2020, 10:00pm.

Sa Biyernes, July 24, 2020, tatlo (3) ang pipiliing Kabataang Tiktoker sa Bakuran of the Week base sa pinakamaraming post reactions (50%) at score ng mga hurado (50%).

Mapapanood ang announcement of winners sa Baliwag Online Community Radio Facebook Page sa programang Baliwag Shoutout, 3:30pm.

Prizes:
2 Runners-up, P100 load each
Kabataang Tiktoker sa Bakuran, P100 load + gift pack