Sinimulan na nitong nakaraang linggo ng Lokal na Pamahalaan ng Baliwag ang clearing operations sa mga kalsadang naapektuhan ng Bagyong “Ulysses”, upang matiyak ang kaligtasan ng bawat isa.
Sa pangunguna ni Mayor Ferdie Estrella, katuwang ang Municipal Environment and Natural Resources Office (MENRO), Baliwag Traffic Management Office (BTMO), Municipal Disaster Risk Reduction and Management Office (MDRRMO), Philippine National Police (PNP)-Baliwag, Solid Waste Management Unit, Brgy Poblacion, Meralco, CM Pancho Construction at ELCOR, ay mabilis na nalinis ang mga kalsada at naayos ang mga poste ng kuryente na napinsala ng nasabing typhoon.
Lubos naman ang pasasalamat nj Mayor Ferdie sa lahat ng mga nagpaabot ng kanilang mga dasal, tulong at donasyon para sa mga Baliwagenyos.
Dagdag pa ng punongbayan, patuloy ang pamamahagi ng relief operations ng pamahalaang bayan para sa mga lubhang naapektuhan ng bagyo. Tinitiyak din ng alkalde na ginagawa nila ang lahat upang sila ay matulungan at makabangon muli.
Para naman sa mga nais magbigay ng kanilang donasyon o tulong, maaari kayong makipag-ugnayan sa Baliwag Public Assistance and Complaint Center o tumawag sa numerong 0977-505-7827.
Bilang pagkilala sa kabayanihan, pinasinayaan ngayong araw ng Miyerkules, Setyembre 30 sa Baliwag, sa pangunguna ni Mayor Ferdie Estrella, kasama sina Konsehal Lowell tagle at ilang miyembro ng Guhit Pinas-Bulacan, ang mural painting na alay para sa lahat ng frontliners, na patuloy na nakikipaglaban sa gitna ng pandemya.
Photo by: Baliwag Web TV
Para kay Mayor Estrella, malaki ang kaniyang paghanga at pag respeto sa lahat ng mga frontliners, dahil hindi biro ang kanilang pagod at sakripisyo, upang mapangalagaan ang kalusugan ng bawat isa.
Lubos din pinasalamatan ng punongbayan ang kaniyang matalik na kaibigan na si Joel Miranda o mas kilala bilang Boss J. Ayon sa kaniya, si Boss J ang nag-alaga sa kaniya noong nagpositibo siya sa COVID-19 at tumulong upang mas mapabilis din ang kaniyang paggaling mula sa nabanggit na sakit.
Dagdag pa ng punongbayan, handog din nya ang proyektong ito sa bayan ng Baliwag ngayong buwan ng kaniyang kaarawan.
Photo by: Baliwag Web TV
Ang obra ay inilikha ng mga Baliwagenyong alagad ng sining na kasapi ng Guhit Pinas-Bulacan na sina Mc Clen Talento, Ralz Jerome Taberao at Lawrence Victorino.
Photo by: Baliwag Web TV
Hango ang nasabing mural sa isa nang naunang likha ni Talento na pinamagatang “Sana Bukas Pagmulat ng ating Mata” na ginamit din bilang poster para sa Araw ng Kalayaan at Linggo ng Wika. Ngunit sa pagkakataon na ito, inilapat nila sa mas malaking pader na may taas na 8 metro at lapad na 14 na metro ang kanyang nasabing obra. Ilang elemento din ang nadagdag dito, kasama na ang mga katagang, “Maraming Salamat” na isinulat sa baybayin.
Photo by: Baliwag Web TV
Kinilala din ng punongbayan ang mga pintor ng nasabing mural, bilang pasasalamat sa kanilang kamangha-manghang obra na matatagpuan sa Baliwag Climate Change Center.
Nag-develop ang Pamahalaang Bayan ng Baliwag ng isang digital application at IT system para mapabilis ang isinasagawang contact tracing sa bayan na ito.
Sa pamamagitan ng IAMSAFE App na isang web based application at mada-download sa Google Playstore, mas mabilis na ngayon ang pag-gegenerate ng report para sa contact tracing.
Ayon kay Mayor Ferdie Estrella, ang IAMSAFE App na nagbibigay ng unique QR code sa users nito ay ginagamit na ng 265, 235 Baliwag residents at non-residents bilang digital quarantine pass, at may feature na State of Health Declaration.
Dagdag pa ni Mayor, “Dahil sa IAMSAFE QR code, maiiwasan ang manwal na pagsusulat na maaaring magdulot ng hawaan. Higit din itong makatutulong upang mapabilis ang pagsasagawa ng contact tracing sa bawat kaso ng COVID-19 sa ating bayan. Kung mabilis nating maisasagawa ang contact tracing ay mas mabilis nating mapipigilan ang pagkalat ng virus na ito.”
Samantala, ang IAMSAFE Contact Tracing System naman ay isang passive tracker ng lokasyon. Ito ay active lamang na nakakapagtala ng footprint ng may account sa tuwing inaabot ng user ang kanyang IAMSAFE QR code sa isang nag-scan na establisyimento.
Ang mga footprint o scanned QR code ay napupunta sa isang storage server at nabubuksan lamang ng isang awtorisadong document controller sa tuwing nasasama ang isang establisyimento na exposed sa isang COVID-19 positive at ang partikular na araw at oras lamang ang binubuksan.
Ito rin ay may audit log upang malaman ang history ng paggamit ng sistema upang maiwasan ang anumang uri ng pag-aabuso sa paggamit nito. Ang mga datos ay kusang nabubura pagkatapos ng 30 araw.
Ayon kay Estrella, “Sinisiguro namin na ang sistema ay compliant sa aming ISO Procedures sa pagkuha ng mga datos at sa Privacy Law ng ating bansa.”
“Bukod rito, ang aming website ay may kaukulang SSL o Secure Socket Layer upang maiwasan ang anumang banta na i-hack at nakawin ang mga datos,” dagdag pa niya.
Matatandaan na noong nakaraang Hulyo ay inilunsad ng Pamahalaang Bayan ng Baliwag ang paggamit ng IAMSAFE Web Application, kasunod ng patuloy na pagtaas ng mga kumpirmadong kaso ng COVID-19 sa nasabing bayan.
Sa pamamagitan ng IAMSAFE QR Code at System, isang pindot lang ay makikita na agad ang mga tao na nakasabayan ng positive patient sa isang lugar, at dahil sa impormasyon na kanilang inirehistro sa kanilang IAMSAFE account, sila ay madaling maaalerto o matatawagan ng Baliwag Contact Tracing Team para sa angkop na payong medikal.
Ang IAMSAFE ay ginagamit na rin sa mga tanggapan ng pamahalaan sa Baliwag, mga simbahan ng iba’t ibang relihiyon, palengke, supermarkets at iba pang commercial establishments na may walk-in clients.
Bilang simbolo ng pag-asa, inilawan ngayong araw ng Biyernes, Setyembre 18 sa Baliwag ang 35-talampakang at maituturing na pinakamataas na Giant Recycled Christmas Tree sa buong Bulacan. May mga disenyo itong Christmas Balls, tampok ang iba’t ibang mukha ng paglilingkod ng mga magigiting na frontliners sa laban kontra COVID-19.
Photo & Concept by Julian Salvador
Ang higanteng recycled Christmas Tree ay gawa mula sa mga recycled at eco-friendly materials na binubuo ng 5,700 ‘used plastic cups’ at 400 kilos na mga pinutol na sanga ng kahoy. Nilagyan din ito ng mga LED lights upang makapagdagdag atraksyon din.
Ayon kay Mayor Ferdie Estrella, ang nasabing Christmas Tree ay magsisimbolo ng pag-asa para sa bawat isa at bilang taos-pusong pasasalamat din sa lahat mga bayaning frontliners, na patuloy na nagbibigay ng kanilang serbisyo at nagsasakriprisyo para sa mga Pilipino na higit na nangangailangan.
Kasabay nito, binuksan na rin ngayong gabi ang Baliwag Bibingkahan Strip sa Heroes Park kung saan mabibili sa take-out, pick-up at delivery services ang mga paboritong pagkain sa Kapaskuhan gaya ng bibingka, puto bungbong at bichu-bichu.
Minabuti rin naman ng lokal na pamahalaan na ipalabas na lang online ang nabanggit na aktibidad, upang maiwasan ang mass gathering at mapanatili ang social distancing sa nasabing pook.
Magandang balita ang ipinaabot ni Mayor Ferdie Estrella sa mga magulang ng pampublikong mag-aaral mula elementarya hanggang junior high school dito sa Baliwag, dahil sa bagong sistema ng pag-aaral sa panahon ng global pandemic, sasagutin na ng Pamahalaang Pambayan ng Baliwag ang mga gamit na kinakailangan para makapagpatuloy ng pag-aaral ang mga bata na walang access sa makabagong teknolohiya sa kanilang mga bahay.
Ayon kay Mayor Ferdie, sasagutin na ng munisipyo ang printing para sa modules na indibidwal na ipamimigay sa mga mag-aaral.
Nilalaman ng nasabing module ang mga leksyon na pag-aaralan ng mga estudyante para sa kanilang mga asignatura, na may 1:1 ratio ng module sa mag-aaral na nakapaloob sa isang customized module bags na libre ring ipapamahagi sa mga mag-aaral.
Bukod dito, palalakasin din ang libreng wifi connection sa 27 barangays at sa mga school zone para sa mga mag-aaral na gagamit ng synchronous learning sa pamamagitan ng online classes.
Dagdag pa ng punongbayan, magbibigay din ang lokal na pamahalaan ng mga internet vouchers na magagamit ng mga mag-aaral sa mga matutukoy na partner internet shops, para sa online learning at pagreresearch ng mga bata, habang mahigpit na ipinatutupad ang minimum health standards.
Nasa P3.7 Milyon ang kabuuang halaga ng printed modules na ipagkakaloob sa mga pampublikong mag-aaral sa Baliwag.
Dahil sa COVID-19, nagkaroon ng malaking pagbabago ang tradisyunal na face-to-face na pag-aaral sa Pilipinas. Sa ilalim ng Learning Continuity Plan ng Department of Education, nakapaloob ang mga Learning Delivery Modes na gagamitin sa panahon ngayon gaya ng online learning, self-learning modules, TV at radio sa pag-aaral ng mga estudyante. Ito ay upang maiwasan ang pagkalat ng na nabanggit na sakit habang wala pang bakuna at gamot na naiimbento para rito.
Magiging available ang mga printed materials na maaaring gamitin ng mga mag-aaral bago ang pagsisimula ng klase sa bagong iskedyul nito sa Oktubre 5. Ito ay ipapamahagi sa bawat barangay base sa iskedyul na itatakda ng DepEd Baliwag.
Imbis na mag-imprenta ng panibagong quarantine pass, ipinatutupad sa Baliwag ngayong panahon ng Modified Enhanced Community Quarantine (MECQ) ang Digital Quarantine Pass na naka-kabit sa hi-tech na IAMSAFE Web App na dinevelop ng Pamahalaang Bayan ng Baliwag noong unang ipinatupad ang lockdown.
Sa pamamagitan ng unique QR Code na ibinibigay sa lahat ng nagrehistro sa nasabing application, mabilis na nai-tag ng Baliwag Municipal Information Communication and Technology Office (MICTO) ang mga awtorisadong lumabas kada tahanan, kung kaya pag punta nila sa establisyemento gaya ng palengke at grocery stores na gumagamit na rin ng IamSafe QR scanner, madaling natutukoy kung sila ay pinapayagang lumabas o hindi ayon sa ipinatutupad na alituntunin ng Baliwag IATF.
Sa Utos Tagapagpaganap Blg. 29 na inilabas ni Mayor Ferdie Estrella noong ika-3 ng Agosto, isinasaad sa Seksyon 3. Clustering at Quarantine Pass, “ang bawat tahanan ay magkakaroon ng isang (1) kinatawan na pahihintulutang makabili ng kanilang mga pangangailangan sa mga araw na itinakda para sa kanilang Barangay. Ang listahan ng mga pangalan na may pahintulot na lumabas sa bawat bahay ay isusumite ng bawat barangay sa Baliwag Municipal ICT Office, na siyang magiging basehan ng tagging na isasagawa ng nasabing tanggapan.
Upang maiwasan ang pagbugso at pagkukumpulan ng mga mamamayan sa iba’t-ibang establisyimento, mahigpit na ipapatupad ang clustering sa Pamilihang Bayan, mga talipapa (Concepcion, San Jose, Sagrada Familia, Sta. Barbara, Tiaong, Ron-Ron atbp.) at mga supermarkets.
Ang IAMSAFE web application ay ginawa para sa mabilis na contact tracing sa bayan ng Baliwag.
Ipinatupad sa Baliwag ang paggamit ng makabagong teknolohiya upang maiwasan ang manual registration sa mga pampublikong lugar at commercial establishments, kung kaya isinulong ang mas mabilis at accurate na pagtukoy sa mga indibidwal na maaaring nakasama ng isang nagpositibo sa COVID-19.
Gamit ang IAMSAFE Web App, mabilis na nakapag-gegenerate ng report para sa contact tracing na sinisimulan sa nakalipas na 14 araw bago lumabas ang resulta sa swab test ng isang COVID patient.
Sa nasabing system, isang pindot lang ay makikita na agad ang mga tao na nakasabayan ng positive patient sa isang lugar, at dahil sa impormasyon na kanilang inirehistro sa kanilang IAMSAFE account, sila ay madaling maiaalert o matatawagan ng Contact Tracing Team para sa angkop na payong medikal.
Ayon Kay Mayor Ferdie, umaabot na sa 173,491 ang individual users ng IAMSAFE QR Code.
Ang automated registration gamit ang QR scanner ay ginagamit na rin sa mga tanggapan ng pamahalaan sa Baliwag, mga simbahan ng iba’t ibang relihiyon, palengke, supermarkets at iba pang commercial establishments na may walk-in clients.
Pormal na tinipon ng lokal na pamahalaan ang lahat ng mga religious pastors sa Baliwag, upang talakayin ang paghahanda na kanilang ginagawa sa kani-kanilang mga simbahan sa ilalim na tinatawag na “New Normal” nitong nakaraang Huwebes.
Layunin ng nasabing pagpupulong na mapag-usapang mabuti ang mga ipatutupad na minimum health and safety protocols at paggamit ng IAMSAFE application ng mga simbahan laban sa coronavirus disease (COVID-19).
Matatandaan na pinayagan na ng Inter-Agency Task Force (IATF) on the Management of Emerging Infectious Diseases ang ilang uri ng mga pagtitipon sa ilalim ng Modified General Community Quarantine (MGCQ).
Kinakailangan lamang na masunod ang 2-meter physical distancing, pagsusuot ng face masks o face shields, may thermal scanning at hand sanitation, at higit sa lahat, limitasyon sa dami ng papasok sa loob ng simbahan.
Para kay Pastor Rey Cruz, pangulo ng Baliuag Christian Ministers Council, malaki ang kanilang pasasalamat sa pamahalaan sa kanilang pagpayag na buksan na ang mga simbahan para sa mga mananampalataya.
Binigyan diin niya, na sisiguraduhin ng bawat Kristiyanong simbahan sa Baliwag na sila ay tatalima sa panuntunan at regulasyon na itinakda ng pamahalaan.
Ayon kay Mayor Ferdie Estrella, bagamat isinailalim na ang buong Bulacan sa MGCQ ay hindi ito nangangahulugan na magsawalang-bahala na ang mga residente sa bantang dala ng COVID-19.
Kaya naman pinaalalahanan ni Mayor Estrella ang mga mamamayan, na doblehin ang kanilang pag-iingat kung sila ay man ay lalabas at dadalo sa mga gawaing pang simbahan.
Tatlong lugar sa tatlong barangay sa Baliwag ang isinailalim sa localized lockdown matapos maitala ang mga bagong kaso ng COVID-19 noong nakaraang linggo.
Sa bisa ng Baliwag Executive Order (EO) No. 27 na inilabas ng Tanggapan ng Punongbayan, idineklara ang lockdown sa mga natukoy na “critical areas” kabilang dito ang bahagi ng lugar sa Libis, Brgy. Poblacion, isang compound sa Calderon St., Brgy. Subic at isang bahagi ng lugar sa Zone 5 ng Brgy. Tangos.
Ayon kay Mayor Ferdie Estrella, dahil sa naka-aalarma na pagtaas ng positive cases sa Baliwag, napagdesisyunan ng buong Baliwag IATF na magsagawa ng lockdown sa tatlong lugar na nabanggit, para maiwasan ang maaaring paglaganap ng virus sa bayan.
Paglilinaw ni Mayor Estrella, ang isinagawang lockdown ay pansamantala lamang at hindi lalagpas sa 14 araw. Binigyan diin ng punongbayan, na hinihintay na lang ang RT PCR TEST results ng mga nakasalamuha o “close contact” ng mga nag positibong pasyente, upang matalakay ng Baliwag-IAFT ang susunod na nararapat na hakbang ukol dito.
Tiniyak din naman ng alkalde na may sapat na suplay ng pagkain ang may 17 pamilya na apektado ng lockdown, matapos magpamahagi ng food packs na naglalaman ng kalahating kabang bigas, mga delata, kape, gatas, biscuit at hygiene kit ang Pamahalaang Bayan, dalawang araw matapos ideklara ang lockdown.
Inilabas na rin ng Baliwag Public Information Office (PIO) nitong nakaraang linggo ang detalyadong impormasyon ukol sa mga Baliwagenyong naging positibo sa nabanggit na sakit para sa kaalaman ng lahat. Pinaalalahanan din ng pamahalaan ang bawat isa na iwasan ang anumang uri ng diskrimansyon lalo na sa mga pasyente at front-liners.
Lubos naman ang pasasalamat ng ilang mga mamamayan sa desisyon na inilabas ng lokal na pamahalaan. Anila, malaking bagay ang gagawing lockdown at pagbibigay ng tamang impormasyon sa mamamayan para sa kanilang pag-iingat laban sa banta ng COVID-19 sa bansa.
Isang high-tech na contact tracing ang itinulak ng Pamahalaang Bayan ng Baliwag, kung saan gumagamit ng QR code na kailangang ipakita sa bawat establisyemento na pupuntahan, bilang tugon sa laban kontra Coronavirus Disease 2019 (COVID-19).
Ayon kay Mayor Ferdie Estrella, ang IAMSAFE ay isang uri ng contact tracing platform na ginawa ng Municipal Information and Communications Technology Office (MICTO).
Aniya, ito ay naglalayon na mas mapabilis ang data gathering at monitoring ng lokal na pamahalaan, sa kalagayang pangkalusugan ng mga Baliwagenyo at mga bisita galing ibang bayan.
Binigyang diin din ng alkalde, ang IAMSAFE na ang magsisilbing bagong logbook ng bawat establisyemento sa Baliwag, bilang bahagi ng ipinatutupad na safety protocol ng pamahalaan, at para na rin sa seguridad at kapakanan ng bawat mamamayan.
Paliwanag din ni Brainard Ardoña, pinuno ng MICTO, na ang IAMSAFE ay pwedeng gamitin ng lahat. Kailangan lamang pumunta sa website na iamsafe.baliwag.gov.ph upang gumawa ng account at i-screenshot ang bibigay na QR o bar code, na siyang ipapakita sa bawat lugar na pupuntahan sa bayan ng Baliwag.
Gayunpaman, lubos pa rin na pinapaalalahanan ng Baliwag COVID-19 Task Force ang mga Baliwagenyo na sundin ang mga itinalagang minimum health standards ng pamahalaan, gaya ng, ngunit hindi limitado sa, pagsusuot ng face mask tuwing lumalabas, paghuhugas ng kamay, at ang pagpapanatili ng social distancing.
Hiling din ni Mayor Estrella ang kooperasyon at pakikiisa ng bawat mamamayan, lalo na sa panahon ngayon ng pandemya, upang maiwasan ang pagkalat ng COVID-19 sa bayan ng Baliwag.
Nagpapasalamat ang 191 miyembro ng Baliwag Jeepney Operators and Drivers Association (JODA) sa tig P1,000 ayudang natanggap mula sa lokal na pamahalaan nitong linggo, na bahagi ng financial assistance na isinulong ni Mayor Ferdie Estrella sa ilalim ng programang “Todo TODA/JODA ang Serbisyong May Malasakit”.
Para sa mga apektadong tsuper, malaking bagay para sa kanila ang natanggap na ayuda dahil ito ay magagamit nila pantustos para sa mga pangunahing pangangailangan ng kanilang pamilya.
Ang ayuda sa JODA ay karagdagan sa naunang ayuda na naipamigay sa may 5,500 lehitimong TODA members sa Baliwag. Sila ay tumanggap din ng tig-P1,000.
Ayon kay Mayor Estrella, mahalaga na mabigyang pansin ang mga tricycle at jeepney drivers, sapagkat sila ay pansamantalang nawalan din ng trabaho at lubos na naapektuhan noong lockdown.
“Umabot sa 5, 691 na mga tsuper ng Baliwag ang makatatangap ng tulong kaya naman naglaan ng mahigit P5.6 milyong pondo ang LGU Baliwag para dito,” ayon sa punongbayan.
Matatandaan na noong isinailalim ang buong Luzon sa ECQ, ipinatigil muna ang operasyon ng lahat ng mga pampublikong transportasyon, nang mapigilan ang paglabas ng mga tao upang makaiwas sa COVID-19.
Noong nailagay ang Baliwag sa GCQ, pinayagan na ang mga TODA na muling makabiyahe subalit mahigpit na ipinatutupad ang paglulan ng isang pasahero lamang kada biyahe.
Ang mga jeep naman ay nag-aantabay ng permiso mula sa LTFRB para muling makabiyahe sa rutang Angat (via Bustos), San Miguel (via San Rafael at San Idefonso) at Meycauayan (via Pulilan, Plaridel, Guiguinto, Balagtas, Bocaue at Marilao).
Ganunpaman, sa konsultasyon ni Mayor Ferdie kamakailan sa mga driver ng PUJs, nagkaroon na ng simulation sa mga terminal kaugnay ng pagsakay ng mga pasahero, gayundin sa mga ipapatupad na minimum health standard gaya ng paglalagay ng plastic barrier para sa paglulan ng 50 porsyento na maximum capacity ng mga pampublikong jeep sa panahon ng community quarantine.
Bahagi ng pagsusulong sa “new normal” upang makaiwas sa panganib ng COVID-19, sinimulan na ng Baliwag Business Permit and Licensing Office (BPLO) ang pag-iinspeksyon sa lahat ng mga rehistradong establisyemento sa Baliwag.
Layunin nito na masuri kung tumatalima ang mga negosyo sa Baliwag sa itinalagang minimum health standards ng lokal na pamahalaan, gaya ng, ngunit hindi limitado, sa social distancing, pagsusuot ng face mask, pagkakaroon ng mga alcohol/hand sanitizer, paggamit ng mga visual signages/markers, at pagsunod sa maximum occupancy capacity.
Sa tala ng BPLO, nasa 4,564 ang negosyo na nakarehistro sa Baliwag ang kailangang inspeksyunin upang masigurado ang kaligtasan ng mga empleyado at kanilang kliyente sa laban kontra COVID-19.
Ayon kay Mayor Ferdie Estrella, mahalagang makapagsagawa ng pagsusuri sa bawat establisyemento, lalo na sa mga mall, kung saan marami mga tao ang dumadayo. Giit ng punongbayan, ito naman ay para sa proteksyon at seguridad ng lahat, lalo na ngayon sa panahon ng pandemic.
Paalala naman ni Nilo Fernando, pinuno ng BPLO, ang mga pamantayan na kailangang sundin sa “new normal” ay nakasaad sa Executive Order No. 23 S. 2020 “Imposition of General Community Quarantine in the Municipality of Baliwag”, Visual Signages at Carrying Capacity Format, na maaaring idownload sa BPLO Facebook.
Sa nasabing executive order, nakasaad na ang mga establisyementong hindi makatutupad sa safety protocols ay maaaring bawian o tanggalan ng kanilang business permit bilang parusa.
Kaya naman mabuting pinaaalalahanan ni Mayor Estrella at ng BPLO ang lahat ng mga mangangalakal sa Baliwag na sumunod sa mga itinakdang quarantine measures ng pamahalaang bayan.
