Baliwag News Service

Matapos na Ideklarang School Holiday ni Mayor Ferdie ang Kapistahan ni Apo Gusting: Kampo ni Ex Mayor Dellosa Naghain ng Reklamo sa Ombudsman Laban sa Kanya

Baliwag, Bulacan – Matapos nga na suspindihin ni Mayor Ferdie Estrella na Special Holiday sa lahat ng mga paaralan, kolehiyo at unibersidad sa Bayan ng Baliwag noong Agosto 28, Kapistahan ni San Agustin ay nagsampa ng demanda ang kampo ni Ex Mayor Carol Dellosa sa Ombudsman.

Matatandaan na noong Agosto 28, pasalamat ng bayan sa Mahal na Patron na si San Agustin ay idineklara itong holiday sa mga paaralan bunsod sa kahilingan ng Kura Paroko at Parish Pastoral Council ng Parokya ni San Agustin. Sa sulat na ipinadala ni Kura Paroko Msgr. Andres Valera, na mahalaga din na masiguro ang kaayusan sa pagdating ng Apostolic Nuncio o ang Kinatawan ng Santo Papa sa Pilipinas na siyang mangunguna sa misa concelebrada. Ang Apostolic Nuncio din ang tumatayong Dekano ng Diplomatic Corps kung kaya’t mahalaga ang seguridad ng nasabing bisita.

Ang nasabing Pangkalahatang Kautusan ay walang pasubaling sinang-ayunan ng Provincial Legal Office. Sa liham na pinadala ng Tanggapan ng Panlalawigang Pambatas, “Walang pagtutol at naaayon sa batas ang nasabing kautusan.”

Sa mahabang panahon din ay ipinagdiriwang na isang special non-working holiday ito sa Baliwag. Hindi nakakapagtaka na ang kaso mula sa kampo ni ExMayor Carolina Dellosa ay isinampa ng kanilang tumayong complainant, dating Market Master Antonio Halina at hindi taga-Baliwag kung kaya’t ang mga ito ay walang pagpapahalaga sa nasabing okasyon.

Samanatala, ipinagkibit balikat lamang ito ni Punongbayan Ferdie Estrella at sinabing handa naman siyang sagutin ang kaso na isinampa laban sa kanya at pinanindigan na siya ay kumilos na ayon sa kanyang kapangyarihan bilang Punong Ehekutibo ng Bayan ng Baliwag. Aniya, “ang mga ganitong kaso ay sinadya upang magdulot ng kalituhan at kaguluhan sa aming kampanya. Nakakalungkot na pagkatapos ng panunutok ng baril ng kanyang militar na security escort sa isang Baliwagenyo ay ito naman ang kanilang isinaalang-alang. Suki pa rin sila ng isang maduming pulitika na gumagamit ng dahas at pananakot.”

Nagpahayag naman ng matinding pagkadismaya ang simbahang Katolika at mga katoliko sa kasong Usurpation of Powers na inihain laban sa alkalde. Ayon sa kanila, “ito ay maliwanag na panginsulto sa mga Baliwagenyo, sa kaniyang tradisyon at pamana.”

Advertisements

Leave a Reply

Your email address will not be published.

This site uses Akismet to reduce spam. Learn how your comment data is processed.