Baliwag Urgent Care Center, pinasinayaan na

Pinangunahan ni Mayor Ferdie V. Estrella ang pagpapasinaya sa Baliwag Urgent Care Center kamakailan bilang katuparan sa kanyang pangarap para sa mga kababayan na bigyan sila ng isang urgent care unit na bukas 24/7.

Ang Baliwag Urgent Care Center ay karugtong ng Baliwag Malasakit Center na nakatayo sa idini-develop na Baliwag Government Complex sa kahabaan ng DRT Highway.

Ito ay nakahandang magbigay ng libreng paunang lunas para sa mga kaso tulad ng pagsusuka, lagnat, pilay, diarrhea, pag-ubo, mild asthma at mild allergies. Binubuo ito ng isang primary service room, delivery room, recovery room at minor operating room.

Ayon kay Dr. Mary Joan Dinlasan, pinuno ng Baliwag Health Office, ito ay kanilang pinangalanang Urgent Care Center ngunit hindi ito nangangahulugan na limitado lamang ito para sa paunang paggagamot. Dagdag niya, maari rin itong magsilbing emergency room sa oras na magsarado ang Baliwag Malasakit Center sa hapon.

Para naman kay Mayor Estrella, labis niyang kinagagalak ang pagbubukas ng nasabing bagong health facility sapagkat isa sa kaniyang mga pangunahing isinusulong ay ang programang pangkalusugan para sa mga Baliwagenyo.

Kaya naman pinagpupursigihan niyang magsulong ng iba’t ibang mga programang nakatuon at nakasentro sa iba’t ibang pangangailangan medikal ng mga Baliwagenyo.

Inaasahang pormal na magsisimula ang operasyon ng Baliwag Urgent Care Center ngayon ring taon upang makapaghandog ng serbisyong may malasakit hindi lamang para sa mga Baliwagenyo kung hindi maging sa katabing bayan ng San Rafael, Pulilan, San Ildefenso, Bustos at sa mga karatig na bayan sa Pampanga na Candaba at San Luis.

####